බින්දු බින්දු පිනි ලිය මත
රටා අඳිනවා
ඈත ලන්ද කසාවතින්
අරුණ දිලෙනවා
සිහින පිරුණු අතීතයට
සිත ඉගිලෙනවා
ලන්ද දිගේ නුඹත් එක්ක
පිය මැන යනවා
ඉපනැල්ලේ වෙල් එළියේ
මතක සුවඳ හැංගිලා
නුඹයි මමයි ගැයූ ගී පද
මද පවනේ දැවටිලා
සුදු මැණිකේ නමින් ලියු
කවි පදයෙක සැඟවිලා
සොඳුරු ලොවක අතීතයේ
සිත කොහේද තනි වෙලා
බෝ මළුවේ සුදු වැලි මත
පත් දහසක් විසිරිලා
හමු විමක අනියත බව
කියයි කනට කොඳුරලා
මල් සුවඳින් සිත පිරුණා
නුඹේ සුවඳ මුසු වෙලා
ඒ සුවඳේ දුරක ගොසින්
සිත කොහේද නැවතිලා
No comments:
Post a Comment